Նևրասթենիա

Նևրասթենիա - կարևոր, շատ հաճախ հանդիպող խանգարում է, որի դեպքում հազվադեպ են դիմում բժշկի, բայց ժամանակի ընթացքում այն խորանում է ու վերածվում ավելի ծանր խնդիրների։

Նևրասթենիա ունեցող անձանց մոտ դիտվում են.

• Գլխացավեր՝ նկարագրում են կարծես օղակի նման ճնշում, ճմլում, երբեմն գլխացավն ունենում է պուլսացիայի բնույթ, ուղեկցվում է ականջներում խշշոցով։
• Հիպերէսթեզիա՝ վառ լույսից, բարձր ձայներից, աղմուկից առաջացող արտահայտված դիսկոմֆորտ, որը նախկինում չի եղել։
• Քնի խանգարումներ՝ դժվար են քնում, անկողինը, ներքնաշորը դառնում են խիստ անհարմար, ամեն չնչին ազդակից արթնանում են, առավոտյան արթնանում են «կարծես քնած չլինեն»։
• Ժամանակի ընթացքում դառնում են էմոցիոնալ խիստ լաբիլ, չեն տիրապետում իրենց հույզերին, պոռթկում են հեշտությամբ «լուցկու ախտանիշ»։
• Տրամադրության ֆոնը ցածր է լինում, սեփական անձից անգոհունակ են լինում։
• Աշխատունակությունը խիստ իջած է, սակայն փորձում են «վերջին ուժերն էլ օգտագործել» աշխատանքը կատարելու համար։

Տարբերում ենք նևրասթենիյի 2 տարբերակ՝ հիպերսթենիկ և հիպոսթենիկ։

• Հիպերսթենիկ տարբերակին բնորոշ է դյուրագրգիռությունը, աֆեկտիվ բուռն ռեակցիաների առաջացումը, ուշադրության խանգարումը և այլն։
• Հիպոսթենիկ տարբերակին բնորոշ է աշխատունակության իջեցումը, անընդհատ հոգնածության զգացողությունը, հետաքրքրությունների պակասումը և այլն։

Շատ հաճախ հիպերսթենիկ տարբերակը ժամանակի ընթացքում վեր է ածվում հիպոսթենիկի։

Բուժման նպատակով կիրառվում են չնչին դեղաչափով դեղորայք և հոգեթերապիա։

Հեղինակ dr.tatevkhachatryan